Поранешниот претседател на Врховниот суд, Јово Вангеловски контра Зоран Заев. Во изјава за Плусинфо, вели поранешниот премиер преку него сакал да покаже дека е голем моќник и негов голем пријател. Тој потенцира дека разговорот е воден во мај 2019 година, кога во Врховниот суд немало предмет во кој тогашното СЈО се појавува како странка.
-Сите тие постапки беа завршени неколку месеци пред тоа. Со господинот Заев, јас како претседател на највисокиот македонски суд, сум имал неколку средби остварени во премиерскиот кабинет при што бев почестен со кафе и со вода. Од тука, мене објавениот разговор или монолог ми наликува на негово себепромовирање во голем моќник, но и претставување како мој голем пријател, вели Вангеловски.
Вангеловски вели дека важен податок од слушнатото, кој кореспондира со подоцнежните случува се споменатите судии, за чие разрешување зборува Заев. Од нив како што вели екс претседателот на Врховен, разрешени се тројца кои не сакале да бидат послушници на власта, а за останатите постапките се запрени, а повеќето од нив унапредени.
-Ако се анализираат повеќе јавни изјави на сопартијци на господинот Заев дадени од високи функционерски позиции, кои во прво лице множина зборуваат за моето разрешување, лесно ќе дојдеме до заклучокот дека се разрешени тројца судии кои не сакале да бидат послушници. Анализирајте кои се останатите судии против кои се водени двете споменати постапки, а за кои постапките се запрени и ќе видите дека повеќето од нив се веќе унапредени. Јас знаев дека постапката за моето разрешување, која сѐ уште трае, е политичка одлука, но добро е дека на овој начин и јавноста ќе биде запознаена, а господинот Заев денес јавно објави дека се работи за автентична снимка, вели Вангеловски.
Вангеловски вели и дека маршот кој Заев го нарече „Чекориме за правда“, се одржувал дента кога имало рочиште по неговата жалба, кое како што вели тој на нивна жал одложило, па листовите од напишаните говори на таа тема им останале за рециклирање.
Матеја Петровски
