Дали синоќа беше сторено кривично дело со повторното праќање на предлог Законот за Јавно обвинителство во Собранието? Имено, Владата новиот текст го прати без истиот да помине на владина седница.
Алфа праша во Обвинителството дали ќе го испита трансферот на новиот предлог текст, но од таму одговор се уште не добивме.
Пратеникот од опозицијата, Антонио Милошоски уште синоќа предупреди дека е прекршен деловникот на Владата.
–Не може Оливер Спасовски сам да достави парче хартија кое нема легитимитет и е злоупотреба на неговата позиција, спротивно на Деловникот на владата и да побара повлекување без владина одлука. – рече Милошоски.
Додека во јавноста се поставува прашањето дали техничкиот премиер ќе добие кривична пријава, Заев вели опозицијата била виновна што морало да се праќа нов текст од законот. Според неговите зборови ВМРО-ДПМНЕ вршеле притисоци кон пратениците да не гласаат за Законот за јавно обвинителство.
Инаку, праќањето на втор предлог текст, Владата го оправдуваше со тоа дека се работело за технички промени. Но ако се споредат двата предлог текста, во вториот може да се забележи и бадентеровиот начин на бирање обвинители, а за разлика од првиот таму се вметнати и одредбите Законот за јазици, кој од Венецијанската комисија беше прогласен за против уставен.
Матеја Петровски
