Подобро да нема нов закон за Јавно обвинителство, отколку истиот да биде донесен со политички договор, порача во своето годишно обраќање републичкиот јавен обвинител Љубомир Јовески. Токму овој закон сепак е една од работите за кои власта и опозицијата не можат да ги приближат ставовите.
-Она што е неопходно, не заради Брисел, е носење нов закон за Јавно обвинителство. Но ќе подвлечам квалитетен и издржан закон, а не решенија кои ќе бидат резултат на дневно политички договорања. Подобро да не се донесе закон, отколку да се изгласа закон со вакви решенија, изјави Јовески.
Иако во јавноста постојат сомнежи дека обвинителите во Македонија работат селективно, Јовески вели такво нешто не е точно. Спомена дека во текот на минатата година Обвинителството отворило истраги против јавен обвинител и пратеник во Собранието. Сепак признава дека не е се перфектно.
-Имаме и проблеми и слабости, но имаме пред се подготвеност за одговорно и ефикасно справување со криминалот. Во годината која изминува се отворија истраги и обвинителите сериозно работеа и работат на предмети во кои сторителите на кривични дела ќе бидат казнети, изјави Јовески.
Јовески најави дека поединечно ќе се оценува работата на секој на секој јавен обвинител преку систем за утврдување на резултатите на обвинителите. Според него на овој начин ќе се евидентира нивната работа со единствена цел зголемување на ефикасноста во постапувањето.
Матеја Петровски
