Владата на Заев постојано се фали со степенот на толеранција и вклученост на сите граѓани во општеството, но американско академско истражување жестоко ги демантира овие фалби. Македонија е дури 80 од вкупно 132 земји во светот кога е во прашање таканаречената инклузија на различните групи на граѓани во општествените текови по различни основи, меѓу кои и нивната етничка односно религиска припадност. Според годишниот извештај на Универзитетот во Калифорнија пред нас се буквално сите земји во регионот освен Црна Гора која е 81. Од поранешна Југославија најдобро рангирана е Хрватска на 13 место, Словенија е триесетта, Србија е на 40 место, додека БиХ се наоѓа на 45 позиција. Очигледно Македонија и покрај силните реклами, паднала на тестот бидејќи е далеку од стандардите кои се нормални во ЕУ со оглед дека во првите 20 места дури 15 се за земји членки на Унијата, а првото место го зазема Холандија. На крајот на листата пак, како најлоши по степенот на инклузивност се земји од третиот свет како Ирак, Јемен, Судан, Мароко и Руанда.
Истражувањето на американскиот универзитет како главни параметри за оценување на толеранција ги зел вклученоста на граѓаните во општеството во зависност од нивниот пол, раса, етничка и религиска припадност, но и дали се на пример лица со посебни потреби. Толеранцијата според експертите подразбира трпеливост кон различни ставови, различни стилови и начини на живот, додека инклузивноста преставува отвореност на општеството да прифати учество на различни групи на луѓе во сите области на општественото битисување. Притоа државата може да воведе различни закони и прописи за инклузивност но тоа не значи дека тие ќе бидат прифатени од граѓаните.
Драган Милосављевиќ
