Дваесет учесници и годинава се претставија на традиционалната “Валандовска ракијада” која по 26. пат се одржува на Градскиот базен во Валандово. Со домашно валандовско грозје одлежано дваесеттина дена, според постапката за варење, учесниците го почнаа процесот на создавање на познатата домашна ракија.
Наградени со прво место за најдобра ракија оваа година беа Лазар Димов и Трајче Зајков, второто место го понесоа Дени Делев и Крсте Арабаџиев, а третото место им припадна на Гуна Маркова и Катица Тунгелова.
Тие велат дека традицијата на варење домашна ракија се пренесува од генерација на генерација, така и самите ја научиле.
Дел од учесниците на оваа манифестација и годинава беа претставниците од средното општинско училиште @Гоце Делчев”, од земјоделско – ветеринарната насока.
Режење, врзување, прскање и полевање се првите подготвителни фази додека да се добие готовиот производ односно грозјето, кое е потребната суровина од која се прави ракијата, вели Ѓорѓи Зафиров, учесник на годинaшната Ракијада.
– Грозјето што го ставаме во вреќи треба да одлежи 21 ден, за да узрее или преврие. Прво го вадиме виното, а потоа ракијата, па на крајот ја правиме мастиката. Во еден казан можеме да свариме сто литри. Грозјето е мелено со машина, а не рачно. Ракијата што ја правиме денес е од сортата на грозје вранец. Од првата година сум на Ракијадата, значи веќе 26 години, а постапката ја научив од мојот татко, мојот син пак научи од мене – вели валандовчанецот Ѓорѓи Зафиров и додава дека начинот за правење на ракија е насекаде ист.
Манифестацијата „Валандовска ракијада” се одржува како традиционален настан под покровителство на Општина Валандово.
