Интеркултурализмот и социјалната кохезија се суштински предуслови за демократски развој, институционална и општествена стабилност, како и за унапредување на европската перспектива на земјата. Во таа насока, останува приоритет да се гарантираат еднаквоста, правичната и соодветната застапеност, како и заштитата на правата на сите етнички заедници во земјава – истакнал министерот за односи меѓу заедниците, Агрон Ферати, обраќајќи се на консултативната средба посветена на изработката на новата Национална стратегија за интеркултурализам и социјална кохезија 2027–2032.
Ферати нагласил дека стратегијата треба да се претвори во конкретен инструмент за спроведување јавни политики, правична застапеност и зајакнување на општествената кохезија. Тој повика на поголема соработка меѓу централните и локалните институции, посочувајќи дека стратегијата треба да содржи конкретни мерки, јасни цели и мерливи показатели за нејзино спроведување и оценување на резултатите.
Тој посочил дека стратегија има за цел да ги утврди насоките и приоритетите што ќе ги водат нашите политики во областа на меѓузаедничките односи во наредните пет години.
-Нашата визија е изградба на еднаква држава, во која етничките, верските и социјалните разлики претставуваат богатство и додадена вредност за општеството. За таа цел, треба да го надминеме моделот на формален соживот и да создадеме култура на активно меѓусебно поврзување, соработка и заедничка одговорност.
Ова, како што навел министерот, бара политики што гарантираат не само еднакви можности, туку и правичен пристап до јавните институции, квалитетни услуги и застапеност заснована врз компетентност и професионализам.
-Вклучувањето на сите релевантни чинители во овој процес е од суштинско значење за квалитетот и одржливоста на документот. Вашата експертиза, искуство и предлози ќе претставуваат значаен придонес во создавањето стратегија што ги одразува реалните потреби на општеството и создава основа за широк институционален и општествен консензус – истакнал Ферати.
Според него, стратегијата и акцискиот план треба да бидат усогласени со националните приоритети, институционалните обврски и европските стандарди.
-Поради тоа, очекувам овој процес да резултира со конкретни мерки и активности, засновани врз стручни анализи и јасно дефинирани цели.
Особено, барам од вас да придонесете кон зајакнување на соработката меѓу централните и локалните институции, унапредување на меѓукултурните политики и нивна практична примена на локално ниво, како и утврдување мерливи показатели што ќе овозможат ефективно спроведување, следење и оценување на резултатите од стратегијата – истакнал Ферати.
Тој на крајот порачал дека целта е оваа стратегија да не остане само насочувачки документ, туку да послужи како основа за институционално дејствување и опипливи промени во општеството и оти заедно треба да изградиме покохезивна, поинклузивна и попросперитетна Македонија.
