Специјалниот американски пратеник Стив Виткоф објави дека најавените преговори меѓу Украина и Русија, со посредство на Соединетите Американски Држави, ќе се одржат на 10 и 11 ноември во Абу Даби. Американските посредници ќе седнат на маса со украински и руски претставници првпат од февруари годинава, во нов обид да се стави крај на војната, за чие завршување претседателот Доналд Трамп постојано даваше ветувања.
Фокусот на преговорите, како што објави Виткоф на социјалните мрежи, ќе биде ставен на безбедносните аранжмани по завршувањето на војната, хуманитарните напори и следните чекори кон постигнување мир. Очекувањата, според него, се да се надгради напредокот постигнат во Киев, Осло и Санкт Петербург, за да се склучи сеопфатен и траен мировен договор, кој ќе обезбеди долгорочна безбедност за идните генерации.
