Неделата на промоција на хумани вредности, која годинава се одбележува од 21 до 27 септември, а под мотото 30 години промоција на хумани вредности на локално ниво беше заокружена со свеченост на Општинската организација на Црвениот крст Велес во Европската куќа во Велес, а на која говореа млади хуманисти и им беа доделени и благодарници за нивниот ангажман и придонес во реализација на проектите на заедницата, информира денеска Орце Николов секретар на Општинската организација на Црвен крст Велес.
Во рамките на настанот се одржала и панел дискусија на која Пенчо Андреев, Сара Јовчевска и Амела Ализотова споделиле свои искуства, сеќавања и приказни поврзани со ПХВ програмата и нејзиното значење за младите.
На 30 млади волонтери кои учествуваа во овогодинешниот ПХВ циклус им биле доделени благодарници за нивниот ангажман и придонес во реализацијата на проектите во заедницата.
– Триесет години ПХВ на локално ниво се три децении исполнети со идеи, млади луѓе и проекти кои оставаат трага во заедницата. Тоа е нашата најважна мисија и затоа и понатаму продолжуваме да работиме на тој план, а со цел ширење на хуманите вредности меѓу нашите млади активисти на Црвениот крст и нивна спроведување во акција на терен, потенцира Николов.
