Здружението „Еко-свест“ денеска во Скопје ќе одржи прес-конференција по повод почетокот на првото издание на фестивалот „ФЛУДО“, нова платформа посветена на спојување на уметноста, креативноста и еколошкиот активизам. Како што соопштуваат од Здружението, прес-конференцијата ќе се одржи во просториите на „Еко-свест“, каде програмскиот координатор Ѓорѓи Митревски ќе говори за концепцијата и содржините на фестивалот.
– „ФЛУДО“ не е само уште еден културен настан, туку простор за едукативна трансформација и социјална промена. Нашата цел не е создавање пасивна публика, туку оспособување на младите да станат гласноговорници кои преку уметноста и креативните медиуми ќе ги артикулираат своите видувања за заштита на животната средина и ќе го водат дијалогот за иднината – стои во соопштението.
Програмата на првото фестивалско издание предвидува интерактивни работилници за стоп-анимација, театар на сенки, сито-печат, цијанотипија и креативно рециклирање. Во уметничкиот сегмент се најавени мултимедијална изложба, проекции на документарни филмови и музички настапи, како и еко-трампа и јавна дискусија посветена на редефинирање на јавниот еколошки наратив.
Повеќе поединости за учесниците и за распоредот на активностите организаторите ќе соопштат на утрешната прес-конференција.
