Во беровското село Митрашинци, денеска, беа одбележани 82 години од формирањето на 50-та Дивизија на НОВ и ПОМ и 14-тата младинска ударна бригада „Димитар Влахов“.
Одбележувањето започна со едноминутно молчење, во знак на длабока почит кон загинатите борци и револуционери, по што делегации положија цвеќе пред споменикот во село Митрашинци.
Пред присутните беше прочитан пригоден реферат, во кој беше потсетено на формирањето и дејствувањето на дивизијата, како и на историските настани и борбите кои го одбележале овој период.
Во рамки на свеченото обраќање, беше истакнат борбениот дух, храброста и непокорноста на разловечките востаници, кресненските бунтовници и илинденските идеолози, чии стремежи и борба низ историјата, придонесоа кон создавањето на независна и самостојна македонска држава.
Свеченоста беше збогатена и со пригодна културно-уметничка програма, подготвена и изведена од учениците од село Митрашинци, кои со својот настап дадоа посебен придонес кон одбележувањето на овој значаен историски настан.
