По притисокот од јавноста, Герасимовски конечно попладнево ја спроведе ветената вонредна дератизација во општината. По неколкудневните бурни реакции од граѓаните за зголемена појава на стаорци и глувци во Центар, денеска и утре општината ќе прска на критичните локации. Опфатени се делови од Буњаковец, Капиштец и Градски ѕид, каде има пријави за зголемена појава на глодари. Герасимовски најави дека, покрај ваквата акција, потребно е и редовно празнење и одржување на контејнерите и канализацијата.
„Денеска и утре спроведуваме нова вонредна дератизација на критични локации во Буњаковец, Капиштец и Градски ѕид, каде што има пријави за зголемена појава на глодари. Но, само дератизацијата не е доволна. Потребно е и редовно празнење и одржување на контејнерите и канализацијата“, објави градоначалникот на Центар, Горан Герасимовски.
Граѓаните, пак, претходно реагираа дека глувци и стаорци има на повеќе места, а особено ги посочуваа критичните точки во близина на училиштето „Песталоци“ и паркингот кај Буњаковец.
Анкета:
Па, треба и дератизација и дезинсекција, затоа што има и тоа и тоа. Сигурно треба и да се чисти и да се дератизира и да се прска.
Почесто, затоа што постојано има ѓубре надвор, никој не се грижи за ѓубрето, а тие бараат храна во ѓубрето.
Обавезно, поготово помеѓу школи, градинки, тоа е ненормална работа. Како дозволуваат такви ѓубришта да се собираат…
Дел од нив сметаат дека појавата на глодари е поврзана и со старите и напуштени куќи во овој дел од Центар, особено оние во близина на училиштето. Велат дека стаорци и глувци забележуваат и во подрумите и околу објектите, а посочуваат и места каде со години нема соодветно одржување.
Глувци, стаорци, причина можеби се старите куќи, многу се одамна.
Да, тука кај ова што е за дрво нешто, што работи една шупа, тука сум видела.
Треба, како не треба, врие тоа, многу има. По подрумите најмногу ги има и тоа умрени, пцовисани.
Проблем со глувци и стаорци нема само во Центарот на градот, туку и во Аеродром и во близина на Железничката станица.
На социјалните мрежи врие – се коментира дека проблемот не може да се решава само кога стаорците ќе излезат на улица. Дел од нив реагираат дека е срамно во 21 век луѓето да се плашат да одат пеш по улиците, а дел предупредуваат дека глодарите не се само непријатна глетка, туку можат да бидат и здравствен ризик.
„Тоа што има наезда на стаорци во Центар, Буњаковец, кај Железничка станица не е ништо ново, туку е проблем игнориран со години…“
„Срамно во 21 век да имаме наезда на стаорци, просто ми е страв пешки да одам.“
„Глодарите носат болести кои може да прераснат во епидемии.“
Ова не е првпат да се алармира за појава на глодари низ скопските општини. Лани десетгодишно дете беше каснато од глушец на игралиште во скопската населба Капиштец, додека си играло со други деца.
