Историски ден за Македонците во Албанија. Резолуцијата на Македонското друштво Илинден од Тирана која ја поднесе до Федералната унија на европски народи, е едногласно усвоена, а во неа покрај поголеми права за Македонците, се бара Пустец да биде преименуван во Преспа, но и гаранција општината да остане како посебна. За претседателот на македонското здружение, Никола Ѓурѓај, ова е значаен чекор во зачувувањето на македонскиот јазик, идентитет и култура на Македонците во Албанија.
„Меѓу барањата во резолуцијата се и потпишување и ратификување на Европската повелба за регионални или малцински јазици, преземање мерки за заштита на македонскиот идентитет од негирање и асимилација, како и гарантирање дека Општина Пустец ќе остане посебна единица на локалната самоуправа и по евентуалната нова административно-територијална реформа“, изјави Никола Ѓурѓај – претседател на македонско друштво Илинден Тирана.
Но, додека од Хелсинки стигнува поддршка за поголема заштита на правата на Македонците во Албанија, на терен, состојбата е поинаква. Македонските здруженија обвинуваат дека Бугарија преку активности претставени како хуманитарни се обидува да влијае врз националното определување на Македонците во Албанија. На 11 и 12 септември Бугарија испрати медицинска екипа од Софија со воен транспортен авион во која бугарски лекари вршеле бесплатни медицински прегледи во државната амбуланта во Пустец. Медицинскиот персонал во Пустец првично не сакал да ги прими бугарските претставници, но под притисок од Регионалниот медицински центар во Корча, бил принуден да им ги отстапи просториите. Од Македонската Алијанса за Еевропска Интеграција најостро ги осудија ваквите активности и појаснија дека Бугарија го злоупотребува здравјето на Македонците за да ги прогласи за Бугари.
„За жал, Македонците во Албанија денес се оставени сами. Недостасува јасна и одлучна реакција од албанските институции, кои дозволуваат ваквите активности да се одвиваат на територијата на Република Албанија“, велат од МАЕИ.
И додека македонските здруженија во Албанија сметаат дека ваквите активности имаат политички мотиви и се обиди за влијание врз националното определување на Македонците, за бугарските власти ова е обична медицинска акција за помош за локалното население.
