По повод одржувањето на традиционалната манифестација „Штипска Пастрмалијада 2026“, која ќе се одржи на 18 и 19 септември 2026 година на шеталиштето „Ванчо Прќе“ и на Градскиот стадион, за обезбедување на безбедно и непречено одвивање на манифестацијата и концертот, полициски службеници ќе бидат ангажирани во зголемен број и повидливо присутни на теренот- информираат во пишано соопштение од СВР-Штип.
Надлежните од СВР-Штип посочуваат дека зголеменото полициско присуство ќе има пред се превентивен карактер, со цел спречување на кривични дела и прекршоци.
-СВР Штип упатува апел до сите граѓани и посетители за одговорно однесување, почитување на законските прописи, сообраќајната сигнализација и насоките на полициските службеници. Воедно, упатуваме посебен апел до граѓаните на општина Штип, доколку имаат можност, во текот на манифестацијата да го намалат непотребното користење на моторните возила, особено на 19 септември и во периодите на најголема посетеност- се посочува во соопштението од СВР-Штип.
Во него се додава и дека со тоа граѓаните на Штип ќе придонесат за намалување на сообраќајниот метеж, полесно и побезбедно движење на граѓаните и гостите, како и непречено одвивање на манифестацијата и концертот.
