Секој медал заслужува честитка, а успехот заслужува поддршка, порача министерот за спорт Борко Ристовски на денешната средба со членовите на македонската параглајдинг репрезентација која го освои 2. место на Европско првенство што се одржа во Крушево.
На првенството настапија 130 натпреварувачи од 30 земји, а Крушево и Македонија уште еднаш се покажаа како одлични домаќини на европската параглајдинг елита. Круна на првенството беа двете освоени медали – злато за македонската натпреварувачка Ана Бергер во женска конкуренција и сребро за македонските репрезентативци во параглајдинг кое го изборија Дарко Станковски, Мартин Јованоски, Ѓорги Ристовски, Глигор Зафиров, Александар Гацевски, Благоја Гроздановски и Јован Северов кој обезбедуваше поддршка од земја.
На средбата, министерот Ристовски им го честиташе успехот на македонските параглајдеристи и истакна дека ваквите резултати се потврда за квалитетот, посветеноста и континуираниот напредок што го бележи Македонија во овој атрактивен спорт.
– Честитки за целиот тим за одличниот настап и за уште еден голем резултат на европската сцена. Зад овој успех стојат огромен труд, знаење, посветеност и тимски дух. Како Министерство за спорт продолжуваме да ги поддржуваме македонските спортисти кои со своите резултати го подигнуваат македонското знаме на најголемите спортски сцени – порача Ристовски.
Успехот во Крушево претставува продолжение на континуираниот напредок на македонскиот параглајдинг. Македонија на Европското првенство во Србија во 2022 година го освои четвртото место, во 2023 година беше трета на Светското првенство во Франција, а сега го освои второто место на Европското првенство на домашен терен.
Македонските параглајдеристи Дарко Станковски и Мартин Јованоски моментално се на третото и четвртото место на светската ранг-листа.
Европското првенство уште еднаш ја потврди препознатливоста на Крушево и на Македонија како врвна параглајдинг дестинација и успешен домаќин на големи меѓународни спортски натпревари.
