Директорот на ЦУК, Мухамед Али, во својство на висок национален претставник и политички директор за отпорност, овие два дена учествува во работни активности во седиштето на НАТО во Брисел, посветени на јакнењето на отпорноста и подготвеноста за справување со современите безбедносни предизвици.
Како што соопштија од Центарот за управување со кризи, агендата опфаќа брифинзи, работни сесии и средби со високи претставници на земјите членки на НАТО, со фокус на актуелните безбедносни ризици, подготвеноста на институциите и размената на искуства и добри практики за поефикасно дејствување во услови на кризи.
– Ова е можност дополнително да ги унапредиме националните механизми за превенција, подготвеност и ефикасен одговор, но и да ја зајакнеме координацијата и соработката со нашите сојузници. Јакнењето на отпорноста значи јакнење на способноста на институциите и државата навремено и ефикасно да одговорат на предизвиците и да обезбедат поголема сигурност за граѓаните – стои во соопштението.
