Градоначалничката на Општина Кисела Вода, Бети Стаменкоска Трајкоска, престојува во Атина, Грција, каде се одржува иницијалниот настан со кој официјално започнува имплементацијата на 42-месечниот проект UrbanFood, односно Одржливи лаборатории за урбани прехранбени системи. Општина Кисела Вода е единствената општина од Македонија која зема учество во овој значаен меѓународен проект.
Домаќин на настанот е Земјоделскиот факултет од Атина, раководен од проектниот координатор CERTH. UrbanFood е проект финансиран од Европската Унија преку програмата Horizon Europe, чија цел е да ги позиционира градовите и урбаните средини како активни двигатели на поздрави, поинклузивни и климатски отпорни прехранбени системи.
Преку шест Одржливи лаборатории за урбани прехранбени системи низ Европа, од кои една е токму Општина Кисела Вода, граѓаните, истражувачите, општините, малите и средни претпријатија и организациите од заедницата ќе ко-креираат и тестираат иновативни решенија. Овие решенија ќе ги поврзуваат одржливото производство на храна, граѓанското учество, дигиталните технологии и партиципативното управување.
Во рамки на настанот, од македонска страна, заедно со партнерот АгФутура Технологии, беше извршена детална презентација за можностите и капацитетите на Општина Кисела Вода кои ќе бидат ставени во функција на успешна реализација на проектот.
Очекувањата од учеството на Општина Кисела Вода се имплементирање на најдобрите европски практики на локално ниво, позиционирајќи ја општината како лидер во иновативни еколошки решенија. Ова ќе значи директен бенефит за граѓаните преку креирање на поздрава животна средина, развој на локалната економија и зголемена партиципација на граѓаните во носењето одлуки за одржлив развој.
Проектниот конзорциум го сочинуваат вкупно 18 партнери од Грција, Данска, Обединетото Кралство, Кипар, Белгија, Полска, Франција и Македонија. Партнерите носат разновидно експертско знаење, искуство и капацитети, овозможувајќи силна меѓународна соработка и сеопфатен пристап кон реализацијата на проектните цели.
