Градоначалникот на општина Пробиштип, Тони Тоневски, директорот на Центарот за развој на Источно планскиот регион (ИПР), Трајче Здравков денеска го потпишаа договорот за реконструкцијата на ракометното игралиште и набавка на нов котел за греење во Средното општинско училиште (СОУ) „Наум Наумовски-Борче“.
Градоначалникот на општина Пробиштип, Тоневски истакна дека проектот опфаќа набавка и поставување на нов, резервен котел, со што ќе се обезбеди сигурна и ефикасна грејна сезона за учениците и наставниот кадар.
-Проектот опфаќа и целосна реконструкција на ракометното игралиште со поставување на нова спортска подлога, обнова на заштитната мрежа, санација на трибините и поставување нови столчиња, како и поставување нови рефлектори. Вкупната вредност на проектот изнесува 4.679.290 денари. Најголемиот дел од средствата се обезбедени од Центарот за развој на Источниот плански регион, преку Бирото за рамномерен регионален развој, додека околу 180.000 денари се обезбедени од буџетот на општина Пробиштип-вели Тоневски.
Изведувач на работите е „Коп Инженеринг“, а надзорот ќе го врши „Евро Консалтинг“. Директорот на Центарот за развој на ИПР, Здравков истакна дека ова е втор проект, кој што се реализира со средства од Бирото за рамномерен регионален развој.
– Веќе започнавме во Општина Пехчево со реконструкција на кровот на детската градинка. Втората активност, како што кажавме, е реконструкција на ракометното игралиште и топловодна котлара во училиштето во Пробиштип, додека во административна процедура сме и за третата активност, односно треба да се изврши и комплетна изведба на енергетска фасада во училиштето „Раде Кратовче“ во општина Кочани-изјави Здравков.
