Можностите за натамошно унапредување на соработката меѓу двете земји во областа на заштитата на животната средина, со посебен акцент на заедничката одговорност за зачувување на природното и културното богатство на регионот, беа разгледани на денешната средба меѓу министерот за животна средина и просторно планирање Муамет Хоџа и неговиот албански колега Софјан Јаупај, кој престојува во Скопје по повод учеството на меѓурегионалната средба на главните преговарачи и високи претставници задолжени за европската интеграција.
Министрите, информираат од МЖСП, разговараа и за конкретни чекори и иницијативи за продлабочување на билатералната и регионалната соработка, во насока на одржлив развој и подобрување на квалитетот на животната средина.
Во пресрет на министерскиот состанок за зелената агенда за Западен Балкан, кој ќе се одржи неделава во Црна Гора, Хоџа и Јаупај ја потврдија определбата за реализација на заеднички активности во согласност со споделената визија за одржлив регион, интегриран во Европската Унија.
