Делегација предводена од заменик-министерот за економија и труд, Марјан Ристески престојува во неколкудневна работна посета на Словенија. Заедно со претставници од повеќе институции, Ристески ќе реализира работни средби со високи словенечки претставници во однос на законската рамка, институционалните практики и примената на правото на Европската Унија во областа на трудот, миграцијата и трудовата мобилност.
Како што соопшти Министерството за економија и труд, целта на студиската посета е размена на искуства кои ќе придонесат во унапредувањето на политиките и институционалната рамка во областа на трудот и трудовата мобилност, согласно европските стандарди.
-Ќе бидат посетени и реализирани средби со високи претставници на Министерството за економија, труд и спорт, Агенцијата за вработување на Словенија, Министерството за внатрешни и јавни работи, како и Канцеларијата за поддршка и интеграција на мигранти, каде ќе се презентираат искуствата на Република Словенија во примената на релевантното законодавство на Европската Унија и практичното спроведување на политиките во оваа област, наведуваат од Кабинетот на Ристески.
Студиската посета е организирана од Меѓународната организација за миграции (ИОМ), во рамки на проектите „Искористување на потенцијалот на дијаспората за напредување во пристапувањето кон Европската Унија и мобилноста на работната сила во Западен Балкан“ и „Регионалната програма за управување со миграцијата (RMGP) – фокус на Западен Балкан и Република Турција“.
