Општина Македонска Каменица објави постапка за набавка и испорака на ново специјално противпожарно возило, наменето за потребите на Територијалната противпожарна единица.
Набавката на новото возило, како што информираат од Општината, има за цел значително да ги зајакне техничките и оперативните капацитети на противпожарната единица, овозможувајќи им на пожарникарите подобри услови за работа и поефикасно извршување на нивните задачи.
Градоначалничката на Македонска Каменица, Соња Стаменкова, истакнa дека вложувањето во противпожарната опрема е директно вложување во безбедноста на локалната заедница.
-Продолжуваме со вложувања во безбедноста на Македонска Каменица. Со набавката на новото специјално противпожарно возило значително ќе ги зајакнеме капацитетите на нашите пожарникари и ќе создадеме подобри услови за нивната работа, но и за побрза, поефикасна и побезбедна интервенција при пожари и други итни ситуации – посочува Стаменкова.
Таа додава дека Општина Македонска Каменица останува посветена на континуираното унапредување на опремата и условите во кои работат службите задолжени за заштита и спасување.
Набавката на специјализираното противпожарно возило се очекува да придонесе за зголемување на подготвеноста на Територијалната противпожарна единица и за подобрување на нејзината ефикасност при интервенции на терен.
Од Општина Македонска Каменица посочуваат дека модернизацијата на опремата и вложувањето во службите одговорни за безбедноста се дел од заложбите за создавање посигурни услови за живот на граѓаните и зајакнување на локалните капацитети за справување со ризици и итни состојби.
