– Министерството за надворешни работи и надворешна трговија денеска по повод 25 годишнината од нападите во САД од 11 септември нагласи дека државата останува цврсто со САД во спротивставувањето на тероризмот и во заштитата на мирот, слободата и демократијата.
-Дваесет и пет години по 11 Септември, се сеќаваме на невините животи што беа изгубени и им оддаваме почит на исклучителната храброст на оние кои беа на првите линии. Цврсто стоиме до САД во спротивставувањето на тероризмот и во заштитата на мирот, слободата и демократијата. Никогаш нема да заборавиме стои во објавата на МНРиНТ на социјалната мрежа Икс.
Во терористичките напади, извршени од припадници на Ал Каеда кои киднапираа четири патнички авиони, загинаа речиси три илјади луѓе. Два авиона удрија во кулите на Светскиот трговски центар, еден во Пентагон, каде што се наоѓа Министерството за одбрана, а четвртиот се урна во Пенсилванија, откако патниците во авионот се спротивставија и се обидоа да ги совладаат киднаперите. И 25 години подоцна останува нејасно која била целта на четвртиот авион. Инаку, голем е и бројот лица кои починаа подоцна, од здравствени проблеми последица на напади.
