Одличните односи меѓу двете земји и континуираната поддршка на Словачка за европската перспектива на земјата и на Западен Балкан биле во фокусот на разговорите во Братислава меѓу првиот вицепремиер и министер за европски прашања, Беким Сали, и словачкиот министер за надворешни и европски работи, Јурај Бланар.
Како што соопшти Министерството за европски прашања, Сали му се заблагодарил на министерот Бланар за гостопримството и за континуираниот ангажман на Словачка во одржувањето на политиката на проширување високо на агендата на Европската Унија, особено истакнувајќи ја активната улога на Братислава во рамките на групата „Пријатели на Западен Балкан“.
– Европската иднина на Македонија е наша стратешка определба и остануваме целосно посветени на реформите и исполнувањето на обврските што произлегуваат од процесот на пристапување. Истовремено, од суштинско значење е процесот да остане кредибилен, предвидлив и заснован на заслуги, при што исполнувањето на договорените обврски ќе биде проследено со конкретен напредок – истакнал Сали.
Во овој контекст, се додава во соопштението, било разговарано и за значењето на добрососедските односи и потребата билатералните прашања да се решаваат преку дијалог, меѓусебно разбирање и почитување, притоа зачувувајќи ги европскиот и реформскиот карактер на пристапниот процес.
Сали истакнал дека Македонија останува посветена на конструктивен дијалог со Бугарија и на градење одржливи добрососедски односи нагласувајќи ја важноста европскиот процес да обезбеди предвидливост и сигурност дека исполнувањето на договорените обврски ќе овозможи напредок кон следните фази од преговорите.
Соговорниците разговарале и за постепената интеграција на земјите кандидати во политиките и единствениот пазар на ЕУ, спроведувањето на реформската агенда и планот за раст за Западен Балкан, како и за можностите за продлабочување на билатералната соработка и размена на словачкото искуство во процесот на европска интеграција.
Сали нагласил дека поддршката од пријателски и партнерски земји како Словачка е значајна како за напредокот на Северна Македонија кон ЕУ така и за зачувување на кредибилитетот на политиката на проширување во целиот Западен Балкан.
