Започна асфалтирањето на улица „1“ во индустриската зона „Чуката“ во Пехчево, со што во завршната фаза влегува изградбата на оваа значајна сообраќајница . Со реализацијата на проектот, индустриската зона „Чуката“ добива нова и современа патна инфраструктура, која треба да овозможи подобар пристап до деловните парцели и полесно одвивање на сообраќајот во зоната.
Изградбата на улицата претставува значаен инфраструктурен чекор за унапредување на условите за работа и инвестирање. Новата сообраќајница ќе придонесе за полесно и побезбедно движење на возилата, подобра транспортна поврзаност, како и поефикасно одвивање на секојдневните активности на компаниите што работат или ќе инвестираат во индустриската зона.
Од Општина Пехчево посочуваат дека подобрувањето на патната инфраструктура е особено значајно за постојните, но и за потенцијалните инвеститори, бидејќи подобрата пристапност создава услови за поефикасна логистика и полесно одвивање на деловните процеси.
-Со изградбата на улица „1“, Општина Пехчево продолжува со активности насочени кон создавање подобри услови за развој на локалната економија и привлекување нови инвестиции. Уредената инфраструктура во индустриската зона „Чуката“ треба да придонесе за зголемување на нејзината атрактивност за домашни и странски инвеститори, како и за создавање услови за развој на производни и други деловни активности, истакнаа од Општина Пехчево.
Од локалната самоуправа упатуваат повик до потенцијалните инвеститори да ги препознаат можностите што ги нуди индустриската зона и да инвестираат во Пехчево, со што, како што велат, се создаваат предуслови за отворање нови работни места и долгорочен економски развој.
Асфалтирањето на улица „1“ е последната и највидлива фаза од изградбата на сообраќајницата, со која индустриската зона „Чуката“ добива подобра инфраструктурна поврзаност и дополнителен потенцијал за развој.
