„Балканот се сретна во Трст“ беше темата на годинешната меѓународна дводневна конференција на Асоцијацијата на балканските новински агенции – Југоисточна Европа, што се одржа во Трст, Италија, во организација на италијанската новинска агенција АНСА.
На конференцијата, директори и главни уредници на членките на АБНА – ЈИЕ, како и политички претставници од регионот и медиумски експерти, дебатираа за улогата на новинските агенции во јакнењето на регионалната соработка, зачувување на слободата на медиумите и справување со дезинформациите.
Извршниот директор на АНСА, Стефано де Алесандри, досегашниот генерален секретар на АБНА – ЈИЕ и директор на бугарската новинска агенција БТА, Кирил Валчев, и претседателот на АБНА – ЈИЕ и заменик-директор на Федералната новинска агенција на БиХ (ФЕНА), Илија Муса, се обратија на неколку панели и се осврнаа на слободата на медиумите укажувајќи на клучните предизвици со кои се соочуваат новинарите во регионот.
Конференцијата во Трст се одржа во рамките на 34. Генерално собрание на АБНА – СЕ.
На Собранието беа донесени буџетот и програмата за работа на АБНА – ЈИЕ за 2026 година, а беа реизбрани и членовите на Управниот одбор. Учесниците го разрешија Кирил Валчев од функцијата генерален секретар на АБНА – ЈИЕ на негово барање поради неговата кандидатура за заменик-претседател на Бугарија на претстојните претседателски избори во октомври годинава. На негово место е избрана Евгенија Друмева, која ќе ја извршува и функцијата генерален директор на БТА. Мандатот на Друмева во АБНА – ЈИЕ е две години.
Следната година домаќин на годишното собрание на новинските агенции од Балканот и од Југоисточна Европа е босанската новинска агенција ФЕНА.
Во АБНА – ЈИЕ членуваат 11 новински агенции – МИА, АТА, „Анадолија“, БТА, ФЕНА, ЦНА, АНА – МПА, „Косова прес“, МИНА, „Аџерпрес“ и АНСА. На 30. Генерално собрание, кое се одржа во Бургас, Бугарија, во 2022 година, АБНА – ЈИЕ, од неформална организација, која функционира над 30 години, стана и формално Асоцијација, здружение регистрирано како правно лице со свој статут и правила на однесување на сите членки, но и критериуми, кои треба да ги исполнат оние што во иднина сакаат да станат дел од оваа Асоцијација. На состанокот во Бургас беше изгласан Статутот, кој е креиран врз основа на правниот документ на Европската алијанса на новинските агенции, со што всушност АБНА – ЈИЕ во своето работење се приближува кон европските стандарди и правила на ЕУ.
