Невладината организација „Hand to Hand“ од Шведска денеска во Битола донираше опрема за соба во основното училиште „Ѓорги Сугарев“ со Центар за подршка на ученици со посебни образовни потреби во Битола која ќе ја користат деца со попреченост и потешки образовни карактеристики.
Во изјава за медиумите, Марија Росенгрен, македонка која живее во Шведска, истакна дека донацијата е во вредност од 4.000 евра и е дел од континуирана поддршка за училиштето во Битола.
-Овој проект се подготвуваше цело лето и денеска се радуваме со постигнатиот резултат. Се што правиме, правиме со љубов кон децата, помагаме и така ќе продолжиме, нагласи Росенгрен.
Ресурсната соба ќе ја користат 15 ученици од редовната настава на ОУ „Ѓорги Сугарев“-Битола, а новоопремената просторија ја користат околу 50 ученици од другите училишта во градот кои имаат потреба од дефектолошки, логопетски и други третмани.
-Ресурната соба ќе ја користат сите ученици кои се со атпичен развој. Ова ќе биде катче во кое секое дете ќе може да најде мир, спокојство и да се стекне со знаења. Според нас, не е инклузивно училиште тоа што треба да промовира инклузија, туку она кое создава и се стреми на секое дете да му овозможи убав престој во училиштето, посочи Билјана Темелкова, директорка на ОУ „Ѓорги Сугарев“ Битола.
Според Анета Христова, доктор на дефектолошки науки, логопет во Центар за поддршка во ОУ „Ѓорги Сугарев“, ресурсната соба ќе пружа услуги кои досега недостигаа, и притоа сите ученици со образовните асистенти ќе користат дидактички материјали за позитивни стимулации.
