Интензивно се одвиваат градежните активности за изградба на нова фекална канализациона линија на крак од улица „116“ во месноста Јака, општина Илинден, соопшти Општината.
Проектот, како што се наведува во соопштението, предвидува изградба на канализациона мрежа во должина од околу 180 метри, со што ќе се создадат подобри услови за приклучување на 15 домаќинства.
-Новата линија ќе биде изведена со полиетиленски цевки со профил Ø250, а по завршувањето на работите ќе биде поврзана со постојниот систем за фекална канализација во Јака. На овој начин ќе се овозможи проширување и унапредување на комуналната инфраструктура во овој дел од населеното место, додаваат од Општината.
Увид во текот на изградбата направи градоначалникот на Општина Илинден, Александар Георгиевски заедно со директорот на ЈКП „Водовод“ Ивица Трипуновски.
При увидот било посочено дека реализацијата на ваквите инфраструктурни проекти е дел од континуираните активности за подобрување на комуналните услови за жителите. Изградбата на новата канализациона линија претставува значаен чекор кон модернизирање на комуналната мрежа и обезбедување поквалитетни услови за живеење во Јака.
Градоначалникот Георгиевски нагласил дека вложувањето во канализационата инфраструктура има повеќекратно значење, бидејќи покрај подобрувањето на секојдневниот живот на граѓаните, придонесува и за поголема заштита на животната средина.
-Со завршувањето на новата линија, Јака ќе добие дополнително унапредена канализациона инфраструктура, а домаќинствата ќе бидат опфатени со системот – додаваат од Општината.
