Општина Чаир и Универзитетот „Мајка Тереза“ потпишаа меморандум за соработка со цел обединување на професионалната експертиза и институционалните капацитети во функција на здравјето и правилниот развој на децата.
Како што соопштија од Општина Чаир, соработката ќе се реализира во рамки на платформата „Чаир во ритамот на здравјето“, преку организирање предавања и активности за учениците насочени кон правилното држење на телото, соодветното носење на училишната чанта и промовирање на физичката активност како значаен фактор за здрав раст и развој.
Градоначалникот на Општина Чаир, Изет Меџити, истакнал дека целта е грижата за здравјето на децата да започне уште пред појавата на здравствени проблеми.
– Сакаме грижата за здравјето на децата да започне пред да се појави проблемот. Покрај знаењето што го стекнуваат во училишните клупи, важно е децата да научат и како да се грижат за себе и за своето здравје додека растат. Преку соработката со Универзитетот „Мајка Тереза“, стручното знаење го носиме директно во нашите училишта, бидејќи најдобрата инвестиција во здравјето е онаа што се прави навреме – изјави Меџити.
Од Општина Чаир посочуваат дека партнерството има за цел да ја зајакне едукацијата и свесноста кај учениците за важноста на здравите навики од најрана возраст, ставајќи ги превенцијата и благосостојбата на децата во фокусот на активностите.
