Во изминатите осум месеци од годинава дебарските пожарникари имале дури 30 интервенции повеќе споредено со истиот период минатата година, поголемиот број пожари биле на отворен простор.
-Во овој период имаме 115 интервенции, наспроти 85 минатата година. Поголемиот број од интервенциите се пожари на отворен простор или 69, на објекти се 22, на сообраќајни средства една, додека останатите се технички интервенции. И годинава за овој период поголем број од пожарите се на отворен простор, изјави, Џетан Мифтароски, командир на ТППЕ Дебар.
Додаде дека најголем по зафатена површина бил пожарот кој избувна вечерта на 29 август, над градот, во атарот на селото Татар Елевци, каде биле опожарени 5 хектари сува трева и нискостеблеста дабова шума, нагласувајќи дека интервенцијата ја отежнувал непристапниот терен.
-Овој период, споредено со истиот лани, поголем е бројот и на техничките интервенции, бидејќи е интервенирано со носење вода во Гостивар, кога беше присутен проблемот со водоснабдувањето во овој град, како и во Одделот за дијализа при Општата болница со проширена дејност во Дебар, кога поради зафат во водоводот Росоки-Дебар, имаше неколкудневен прекин во снабдувањето, посочи тој.
Поради високите температури и зголемениот ризик од пожари Мифтароски го повтори апелот до сите граѓани да се однесуваат одговорно при движење на отворен простор, а во исто време потсети дека пред претсојната грејна сезона неопходно е навреме да ги исчистат оџаците.
-Сите треба да бидеме свесни дека со нашето совесно однесување придонесуваме во заштитата на животна средина, имотите и заедниците во целина. Потсетувам дека во сила е целосната забрана за движење во шумите до 30 септември. Секако уште еден апел до граѓаните, пред почетокот на грејната сезона да ги исчистат оџаците, кои беа главната причина за пожарите на објекти, рече Мифтароски.
Четиринаесетте пожарникари на оваа единица, интервенираат на подрачјето на општините Дебар, Центар Жупа, како и подрачјето на Река, општина Маврово и Ростуше.
