Општина Илинден соопшти дека годинава во училиштата на нејзина територија има 184 првачиња, 20 отсто повеќе отколку во минатата учебна година.
-Во услови кога на државно ниво се бележи намалување на бројот на запишани ученици, растот на бројот на првачиња во општина Илинден е особено позитивен показател за развојот на општината, како и на зголемување на бројот на млади семејства и деца кои живеат во неа, наведува Општината и информира дека во нејзините училишта учебната година денеска почнала „со нови училишни ранци, насмевки и возбуда“.
На првиот училиштен ден градоначалникот на Илинден, Александар Георгиевски, ги посетил општинските основни училишта „Гоце Делчев“, „Ристо Крле“ и „Браќа Миладиновци“, им посакал добредојде на најмладите ученици и им поделил ранци со училиштен прибор.
-Покрај традиционалното обезбедување ранци и училиштен прибор за секое прваче, оваа година Општина Илинден воведе и нова мерка за поддршка на семејствата – првпат секое прваче добива и финансиска поддршка во износ од 3.000 денари. Со оваа мерка, Општина Илинден дополнително им помага на родителите во периодот кога започнуваат новите училишни обврски, а воедно ја потврдува определбата за континуирана поддршка на најмладите жители и нивните семејства, информира Општина Илинден.
Во текот на летниот распуст во училиштата во Илинден биле реализирани повеќе активности за подготовка на објектите и подобрување на условите за настава, што, се наведува во соопштението, „дополнително ја потврдува заложбата на општината за подобрување на воспитно-образовниот процес на учениците“.
Во основните училишта на територијата на општината Илинден годинава има околу 1630 ученици, а во средното училиште се 300 ученици.
