Националната агенција за европски образовни програми и мобилност (НАЕОПМ) соопшти дека по повод првиот училиштен ден нејзини претставници ги посетиле руралните училишта „Христијан Тодоровски Карпош“ во општина Ранковце и истоименото училиште во село Герман.
Директорката на Агенција, Ана Михајлов, и градоначалникот на Ранковце, Даниел Павловски, им поделиле ранчиња на учениците на настанот на кој домаќин бил заменик-директорот на училиштето, Мартин Маџовски.
-Денес сме тука за да им покажеме на учениците дека се важни и дека поддршката и можностите треба да бидат достапни за сите, без разлика каде живеат. Како Национална агенција, продолжуваме да бидеме присутни и да помагаме таму каде што нашата поддршка е најпотребна – изјави директорката Михајлов.
НАЕОПМ соопшти дека посетата е дел од нејзините заложби за поддршка на училиштата и учениците од руралните средини.
-Инклузијата е еден од приоритетите на Националната агенција, со цел секое дете да има еднакви можности за образование и развој. Со ваквите активности Нацоналната агенција испраќа порака дека можностите треба да бидат достапни за сите деца, без разлика каде живеат, се наведува во соопштението на НАЕОПМ.
