Македонија мора да оди напред со дигитализацијата, а еден од клучните чекори е изградбата на национален центар за податоци. Тоа во пракса ќе значи помалку шалтери, помалку чекање, помалку хартија – повеќе брзи и достапни услуги.
Борис Арсов од Секторот за телекомуникации во АЕК за „Алфа“ објаснува колку со податочните центри ќе им се олесни животот на граѓаните, но и на институциите. Ќе добиваат побрзи услуги, побрзо добивање информации и посигурно чување на податоците.
Наместо секој човек да трча по институциите, од шалтер на шалтер, потребата за документација ќе се завршува на едно место. Според Арсов, ваков центар е неопходен за земјата.
„Без разлика дали станува збор за реформска агенда или било што, Македонија треба да оди напред во делот на дигитализацијата. Во таа насока е и изградбата на еден таков национален дата-центар, кој би им служел на државните институции, на граѓаните и на сите кои имаат потреба да дојдат до брзи информации, брзо процесирање на информации и складирање на информации, брз интернет, брзо користење на видеозаписи. Таков национален дата-центар е навистина неопходен за Македонија“, вели Борис Арсов од АЕК.
Експертите оценуваат дека примерот од светот покажува колку е важна оваа дигитална инфраструктура. САД веќе имаат илјадници центри за податоци, каде што се обработуваат огромни количини информации.
„САД имаат над 4.000 дата-центри, и тоа од голем калибар, кои собираат многу голем број податоци и обработуваат голем број податоци“, изјави Арсов.
Идејата за новиот центар за податоци е да ги поврзе сите државни институции во еден национален облак и да обезбеди поголема сајбер-заштита. Ќе биде поврзан и со секундарниот дата-центар во Прилеп, со што, според надлежните, ќе се намали ризикот од хакерски напади и губење на податоци.
Овој предлог опозицијата остро го критикуваше, со образложение дека ваквите информативни центри ги ставаат во ризик водата, струјата и земјоделството во државата.
Владата и натаму останува на ставот дека Македонија треба да гради национален дата-центар. Премиерот Христијан Мицкоски неодамна кажа дека проектот ќе се финансира со европски грант и поволен заем и дека се преговара со пет-шест потенцијални инвеститори за нивната изградба.
