Општина Илинден започна со изградба на нов парк во населеното место Миладиновци, во рамки на активностите за уредување и унапредување на јавните површини и создавање нови рекреативни содржини за граѓаните.
Како што соопшти Општината, со проектот е предвидено целосно уредување на постојниот простор со нови зелени површини, пешачки патеки и урбана опрема.
Во рамки на градежните работи ќе бидат изградени нови бетонски и павер-површини, а посебен акцент е ставен на содржините за најмладите. Предвидена е изградба на детско катче со кула и лизгалка, лулашка и клацкалка, како и поставување клупи за одмор и дружење.
Градоначалникот на Општина Илинден, Александар Георгиевски, кој изврши увид во почетокот на градежните активности, појасни дека со реализацијата на проектот просторот ќе добие нова функција и современ изглед.
– Со изградбата на паркот, досегашниот простор ќе добие целосно нов изглед и намена, создавајќи уредена и безбедна средина која ќе придонесе за поквалитетно секојдневие на жителите на Миладиновци – истакна Георгиевски.
Од Општината посочуваат дека уредувањето на јавните површини и создавањето нови зелени и рекреативни содржини остануваат меѓу приоритетите на локалната самоуправа, со цел обезбедување похумана, поуредена и пофункционална средина за живот.
