Македонските судии Елена Соклевска Илиевски, Тамара Цветановиќ, Ангелчо Ристов и Александар Николоски добија значајни назначувања во завршницата на фудбалските натпревари на Медитеранските игри во Таранто. Тројца од нив ќе бидат дел од судискиот тим на женското финале, додека Николоски е делегиран за натпреварот за третото место во женска конкуренција.
Соклевска Илиевски, Цветановиќ и Ристов денеска ќе делат правда на финалниот натпревар меѓу Португалија и Италија, кој ќе се одигра од 19 часот на стадионот „Еразмо Јаковоне“. Главен судија ќе биде Тјаша Мисја од Словенија, а македонските интернационални асистентки Соклевска Илиевски и Цветановиќ се назначени за помошни судии, додека Ристов ќе ја извршува функцијата четврти судија.
Изборот на македонските арбитри за финалето претставува значајно признание, со оглед дека тие се избрани меѓу 26 судии од осум земји учеснички на турнирот: Турција, Албанија, Словенија, Македонија, Алжир, Мароко, Тунис и Италија.
Соклевска Илиевски и Цветановиќ се меѓународни асистентки со долгогодишно искуство на домашната и меѓународната сцена, а нивниот ангажман на финалниот натпревар е уште една потврда за квалитетот на македонското судење.
Воедно, македонскиот асистент Александар Николоски ќе биде дел од натпреварот за третото место во женска конкуренција меѓу Мароко и Словенија, кој се игра денеска во Бриндиси со почеток од 10:30 часот.
Николоски и Ристов вчера беа дел од судискиот тим на мечот за третото место во машка конкуренција меѓу Италија и Мароко, кој заврши со победа на Мароканците од 4:1.
Во машкото финале, селекцијата на Алжир го освои златниот медал откако со 2:0 ја совлада репрезентацијата на Тунис.
