Општина Делчево продолжува со конкретна поддршка за младите и успешните ученици преку доделување ученички стипендии за учениците од СОУ „Методи Митевски – Брицо“.
Со мерката се предвидува доделување на вкупно 19 стипендии, наменети за поддршка на образовниот успех, трудот и талентот на учениците, како и за создавање еднакви можности за образование и развој.
Од нив, 10 стипендии во износ од 2.000 денари месечно, во период од девет месеци, се наменети за ученици од семејства со ниски приходи.
За успешни ученици се предвидени осум стипендии, во месечен износ од 2.500 денари, исто така за период од девет месеци.
Дополнително, една стипендија во износ од 1.500 денари месечно, за девет месеци, е наменета за ученик со попреченост во развојот.
Од Општина Делчево посочуваат дека преку оваа мерка се вложува во знаењето, потенцијалот и иднината на младите, со цел нивниот труд и посветеност да бидат препознаени и поддржани.
Поддршката на учениците, како што се наведува, е дел од заложбите за создавање подобри услови за образование и развој на младите во Делчево.
