Од Скопје до Калкута – животот на една жена кој остави трага низ целиот свет. По повод 116 години од нејзиното раѓање, Македонија го одбележува името и делото на Мајка Тереза преку повеќедневна манифестација. „Деновите на Света Мајка Тереза“ ќе се одвиваат до 5-ти септември преку културни и хуманитарни настани, а ќе бидат отворени и три изложби посветени на нејзиниот живот и дело.
„Денес сме тука на одбележување на 116 годишнината од раѓањето на Мајка Тереза, Гонџа Бојаџиу, која што ја даде пораката на хуманоста на човештвото. Наша чест е дека она е скопјанка и албанка, па со тоа не прави горди и не обврзува нејзината порака да ја спроведуваме и во политиката и во секојдневниот живот.“, изјави Беким Сали, министер за европски прашања.
Одбележувањето започна утрово со положување цвеќе пред спомен плочата на нејзината родна куќа, а на преостанатите настани ќе присуствува и косовскиот премиер Албин Курти. Родена во Скопје како Гонџа Бојаџиу, целиот свој живот го посвети на сиромашните, болните и најранливите – Од нејзиното име, Скопје доби симбол на хуманост и милосрдие. Во 1950 година во Калкута ја основа заедницата „Мисионерки на милосрдието“, преку која нејзината мисија се прошири низ целиот свет. Работела на места погодени од војна, природни катастрофи и голема сиромаштија. Во времето на нејзината смрт, заедницата имала повеќе од 4.000 сестри и стотици мисии низ светот. За својата работа во борбата против човечкото страдање, во 1979 година ја добила Нобеловата награда за мир.
Оваа година одбележувањето има посебно значење – се навршуваат 10 години од нејзината канонизација. На 4-ти септемри 2016 година, Мајка Тереза беше прогласена за светица во Ватикан – Света Тереза од Калкута. И по речиси три децении од нејзината смрт, нејзината порака останува иста – дека човечноста започнува тогаш кога ќе му пададеме рака на оној на кого му е најпотребна.
