Заврши реализацијата на проектот „Регулација на Кајанечки дол“ во село Истибања, во должина од околу 870 метри.
Во рамки на проектот е извршена и изградба на два патнички и три пешачки моста, со што значително се подобрува безбедноста, функционалноста и инфраструктурата во ова населено место во Општина Виница.
-Со изградбата на отворениот канал за регулирање на Кајанечки дол се овозможува превенција и ублажување на последиците од поплави и природни и од човекот предизвикани катастрофи, заштита на населението и зачувување на природната околина, смета виничкиот градоначалник Митко Костадиновски.
Покрај подобрувањето на безбедноста, со реализацијата на проектот овој дел од селото доби нов и поуреден урбан лик, нагласува тој.
Во следниот период, според најавата на градоначалникот Костадиновски, следува изработка на проектна документација за асфалтирање на дел од улицата покрај Кајанечки дол во Истибања, која досега не е асфалтирана.
Вкупната инвестиција достигнува 19,5 милиони денари, средства што Општина Виница ги обезбеди од Министерството за животна средина и просторно планирање, преку владиниот повик за инфраструктурни проекти.
