Регистриран е уште еден заболен од западнонилска треска. Пациентот бил со лесна клиничка слика и амбулантски третиран, потврдија за „Алфа“ од Центарот за јавно здравје. Вкупниот број на потврдени случаи се искачи на 44.
Досега од вирусот починаа пет лица, сите над 60 години и со коморбидитети. Од почетокот на епидемијата до сега, 21 пациент е отпуштен од болничко лекување, а уште четворица пациенти се очекува да бидат отпуштени во текот на денот.
Изминатата недела во Скопје беше лоциран и мртов гавран позитивен на вирусот. АХВ апелира до граѓаните да пријават доколку најдат мртва птица.
Надлежните мапираа 34 ризични подрачја, од кои 13 се високоризични, и на тие места се спроведува дезинсекција. Станува збор за канали и други места со застојана вода, кои се легла за комарци.
До граѓаните останува апелот да се заштитат од комарци, а штом почувствуваат симптоми како покачена температура, силна главоболка, вкочанет врат или дезориентираност, веднаш да се јават кај својот матичен лекар.
Инаку, денеска министерот Клековски беше во посета на Инфективната клиника и информираше дека медицинскиот персонал е подготвен за справување со епидемијата на западнонилска треска.
