Меѓународна ликовна колонија „Михајлово 2026“ по јубилеен 30. пат утре започнува во Кавадарци, информираше денеска ликовниот уметник Владимир Темков, куратор на манифестацијата.
Темков соопшти дека на колонијата ќе учествуваат голем број ликовни уметници од земјава и од странство. Тој рече дека станува збор за еден од најзначајните вакви настани во државата, поддржан од Министерството за култура и туризам и локалната самоуправа.
– Природните убавини на Тиквешијата, како и секогаш, ќе бидат инспирација за творење на уметниците. Меѓу нашите гости имаме докажани и наградувани ликовни уметници, кои ќе го овековечат престојот во најголемиот лозаровинарски регион во државата – истакна Темков.
Традиционално, колонијата започнува со ликовна изложба и дела, претходно создадени од некои од учесниците. Овојпат, љубителите на уметноста ќе ги погледнат делата на турската ликовна уметница Мелихат Тузун, декан на турскиот, Тракиски Универзитет.
Изложбата е насловена „По стапките на животот“ и ќе биде отворена утревечер во Домот на културата „Иван Мазов – Климе“.
На утрешното отворање ќе бидат доделени плакети на сите општествено одговорни компании што изминатите 30 години имаат придонесено за развојот на оваа ликовна колонија.
Уметниците ќе творат во прекрасниот амбиент на месноста Моклиште кај кавадаречкото село Ваташа.
