Првиот човек на ССМ, Слободан Трендафилов без одговор на сериозните обвинувања кои пред камерата на Алфа вчера ги упатија дел од вработените. Алфа побара негов став за наводите за мобинг, откази, суспензии и сомнежи за финансиското работење на Синдикатот, но не успеа да воспостави комуникација за да добие одговор. Наместо објаснување од првиот синдикалец, се уште остануваат отворени низа прашања. Во последниве два дена, тој одржа говор по повод 80 години од формирањето на синдикатот и по тој повод даде и интервју на еден македонски телевизиски канал, но никаде не се осврна на обвинувањата дека токму тој, којшто пред камерите се бори за работничките права е истиот оној кој ги прекршува.
Дел од вработените во ССМ тврдат дека додека Трендафилов на улица се бори против мобингот и незаконските откази, токму тој зад затворени врати го практикува, а синдикатот наместо кој треба да биде бастион за заштита на работниците е место кадешто тие не се сигурни.
Тие рекоа дека Трендафилов им поделил откази на седуммина вработени, додека четворица суспендирал. Бројни се и обвинувањата за мобинг, притисоци и понижувања на работното место.
„ССМ нелегитимниот синдикалец Трендафилов го претвори домот во Капела. Ме избрка избрка 7 души, 4 се суспендирани. А замислете се бори за човекови права. Пушташе плата по 3000 денари, а велеше по медиуми кој ќе дава под минималец ќе одговара кривично. А што е ова, во неделата двапати по 3000 денари. Дали се тоа пари. А се бори за работнички права… А замислете тој е претседател на ССМ, претседател на трговија генерален секретар на градежници, и по одбори, има преку 200.000 300.000 денари располага со кола, тој ужива како лорд“,изјави Љупчо Димовски.
Вработените кои јавно се пожалија на односот кон работниците во ССМ се сомневаат дека причина за ваквото однесување е да се прикријат малверзациите во работењето со буџетот. Тврдат дека пред неговото доаѓање на функцијата во 2023-та по смртта на дотогашниот прв синдикалец Дарко Димовски, на сметката имало околу 600.000 денари, додека денес таа била речиси празна. Се додека Трендафилов не излезе со став, факти и бројки против ваквите наводи, остануваат отворени низа прашања – за отказите и суспензиите, за наводниот мобинг и за финансиското работење.
