Во време на глобална криза, стангирање на европските пазари, македонската економија покажа жилавост. Македонските компании успејаа да го најдат патот кон странските пазари, за што сведочи податокот за зголемен извоз во време на економска криза. Владината поддршка за извозно ориентираните домашни и странски компании е една од причините за ваквите резулати. Според експертите, не само владините политики, туку и присобливоста на македонските компании за одржливо производство придонеле за зголемување на извозот за 19 проценти во првото полугодие годинава.
„Во услови на ограничена потрошувачка македонските компании си го бараат патот до профитабилност,а односно до пазарите каде што може да ги пласираат производите. Мислам дека успешно се снаоѓаат во овие услови, затоа што во недостаток на суровини, други средства за работа македонската економија многу добро се позиционира ов поглед на извозните можности,’ вели економскиот и финансиски експерт Ромео Костадинов.
Според структурата на извозот од Македонија, најмногу сме извезле катализатори, а од вкупниот обем на надворешнотрговската размена, најмногу се тргувало со Германија, Велика Британија, Кина, Грција и Србија, кои учествуваат со 50.0 % во вкупниот обем на размената. Но, за продолжување на ваквиот тренд, експертите советуваат реструктурирање на извозно ориентираните компании, кои место досегашната практика да имаат одржливо производство, треба да се насочат кон прогресивно производство што ќе генерира поголем извоз.
„Овие факти радуваат затоа што преминот од одржливо во ефикасно, односно профитабилно производство е многу мал. Разликата е многу мала и мислам дека македонската економија се движи во вистински правец, во правилна насока во моментот според овие параметри. Многу малку треба за една економија да може да процвета, односно да ги покаже максималните резултати“, додава Костадинов.
Експертите се убедени дека првата половина од годинава покажува дека владините политики за поддршка на извозот ќе бидат основа за иден раст на македонската економија, која има изгледи од увозно зависна да прерасне во извозно ориентирана во одредени сегменти.
