Бензинот поефтинува за два денари, дизелот поскапува за еден денар. Регулаторна Комисија за енергетика ги објави новите цени на горивата во Македонија. Од полноќ бензинот од 95 октани ќе се продава за 91 денар за литар, додека ЕУРОСУПЕР БС-98 чини 93 денари за литар. Дизел горивото пак ќе се продава по цена од 99,50 денари за литар. Екстра лесното масло за домаќинство поскапува за 0,50 денари и ќе чини 98,50 денари за литар. Мазутот М-1 НС поевтинува за 1,680 денари за килограм, со што неговата максимална цена ќе изнесува 46,419 денари за килограм.
Од РКЕ посочуваат дека во пресметката е применета намалена акциза од два денари за литар кај бензините и од четири денари за литар кај дизелот. Утврдените цени се максимални, а трговците можат да ги продаваат горивата и по пониски цени.
И покрај минималното поскапување на дизел горивото, сепак Македонија останува со најефтини горива во регионот. Најголема разлика во цената има кај бензините. Во регионот граѓаните ќе плаќаат во просек поскап безнин за околу 18 евро центи или над 11 денари за литар. Кај дизел горивата, Македонија е повторно најефтина, но и Бугарија и Црна Гора имаат приближно иста цена, додека поскап дизел ќе точат граѓаните во Србија и Грција, нешто под две евра, додека пак цената на ова гориво во Албанија надмина веќе 2 евра за литар.
Македонската влада продолжува со следење на цената на горивата и понатаму останува во заштита на стандардот на граѓаните. Во Македонија до 20-ти октомври важи одлуката за кризна состојба, со што доколку се случи нагло поскапување на цената на горивата на светските пазари, може да се очекува и намалување на ддв-то за горивата. Ова е во случај ако цената на тон гориво достигне 1200 долари. Засега нема најави дека ова ќе се случи. Паралаленио на светските берзи минатата недела цената на нафтата забележа пад од околу 4 насто и во еден момент се спушти на 83 долари за барел. Оваа недела таа се движи на границата од 84 до 85 долари за барел. Од септември се очекува дополнително намалување на цената на горивата, бидејќи земјите од ОПЕК плус најавија зголемување на производството на нафта, со што ќе се зголеми понудата на црното злато на светкските пазари.
