Вода пијат пакувана, раце мијат и готват снаоѓајќи се од селски чешми бунари и донации. Гостиварци едвај преживуваат од ден во ден. Чешмите течат, но водата останува неискористена за основните потреби. Граѓаните се жалат дека оваа ситуација е неиздржлива. Најтешко им е на семејствата со мали деца и на старите и болни луѓе.
Градската вода се уште не е технички исправна. Граѓаните се снаоѓаат кој како знаат и умеат. Додека институциите бараат решение, секојдневието на гостиварци е хаотично. Не можат да се бањаат, не можат да перат ниту да готват.
Наместо до кујната, гостиварци секој ден одат до продавница или до пунктовите каде што се дели вода. На околу шест точки во градот има пунктови каде што се дели вода за пиење.
По еднонеделната криза и прогласената епидемија, гостиварци најмногу сакаат да слушнат кога од нивните чешми ќе потече чиста вода.
Надлежните повикуваат на смиреност, редиците од граѓани кои чекаат пред пунктовите за вода не се потребни – велат дека вода има за сите.
Владата која по прогласената кризна состојба во Гостивар е целосно мобилизирана за средување на хаосот. Последните прогнози се дека за помалку од една недела гостиварци ќе добијат техничка вода, а веднаш потоа и вода за пиење.
Ања Лукарова
