Турција и оваа година останува најисплатлива дестинација за летен одмор, или во превод, и летовите и услугите таму се на задоволително ниво за македонскиот џеб, додека Франција и Италија во моментот се убедливо меѓу најскапите во Европа. Ова значи дека и патот до таму, и храната, и сместувањето чинат повеќе.
Според бројките на европската статистика, Евростат, ако за услугите за кои во земјите од ЕУ би потрошиле 100 евра, за истите во Турција треба да се издвојат само шеесеттина евра. За хотелско сместување и јадење во ресторани, во Франција би платиле во просек околу 120 евра, а Италија е за нијанса поевтина, со просечна цена на услугите од 110 евра. Во Турција, пак, би потрошиле за истите работи околу 75 евра. За цигари и јавен превоз во Турција би потрошиле 25 евра, додека во Франција околу 190 евра.
Според туристичките агенции, граѓаните најмногу го претпочитаат концептот „ол инклузив“, бидејќи однапред ги знаат речиси сите трошоци.
„Најбарани се бидејќи во тој пакет е вклучен авион, трансфер до хотел, а и хотелите нудат услуга каде што е сè вклучено – сместување, оброци, пијалоци, пијалоци во барови, платени се и лежалки и чадори, анимации за децата, вечерни забави. Сите семејства кои одат со деца немаат вонредни трошоци, таму одат без никакви потреби од дополнителни плаќања. Анталија е најпривлечна“, изјави Сузана Зелениковска – „Фибула травел“
Од туристичките агенции велат дека за Македонците се привлечни и автобуските патувања до Грција и Црна Гора, а како најпопуларна и најефтина веќе неколку години по ред ја издвојуваат Албанија.
„Грција е број еден летна дестинација и за фамилии, и за помлади, и за друштво. Тука е и Албанија, која е дефинитивно најефтина. Се бара и Црна Гора, тоа се автобуските понуди. Чартер-летовите забележуваат послаб интерес од лани, но сепак се најбарани за фамилии бидејќи се нуди цел пакет. Турција е најбарана чартер-дестинација, па Египет, па Тунис“, изјави Силвана Јовановска – „Го травел“
На крајот од листата се наоѓа Франција, која е најскапа меѓу туристичките дестинации што ги анализира Евростат, особено кога станува збор за хотелите и угостителските услуги. И Италија е меѓу поскапите дестинации, додека Шпанија и Грција нудат поумерени цени, но сепак можат значително да варираат во зависност од регионот и туристичката сезона. Португалија се издвојува како една од најисплатливите дестинации кога станува збор за хотели и ресторани.
Од туристичките агенции велат дека летната сезона добро тече, но во шпицот на јули и во термините во август се забележува благо намалување на интересот. Според нив, тоа се должи на поскапувањето на горивото, но и на повисоките цени на сместувањето. Сепак, велат дека секоја дестинација има свои туристи, а сè зависи од интересите и буџетот на граѓаните.
