Пред точно четири години бугарските уцени, Бугарите во Уставот, негирањето на македонскиот јазик и идентитет, станаа услови и на европскиот пат на Македонија. Заслуга за тоа имаат потписите на тогашниот министер за надворешни работи Бујар Османи и тогашната шефица на бугарската дипломатија Теодора Генчовска.
Се тоа под покровителство на екс премиерот Димитар Ковачевски, кој со високо кренати раце во Собранието го прослави прифаќањето на Францускиот предлог, со кој Македонија само доби мачка во вреќа и бугарски вета во серија.
-Да живеат граѓаните, да живее Република Северна Македонија, кажа Ковачевски со кренати раце во Собранието.
Содржината на документот се чуваше во тајност до потпишувањето, беше протната преку неколкучасовни брифинзи на тогашниот премиер. Оценката на познавачите и тогаш и денес е дека протоколот е класична капитулација на земјава. Спорни се пред се одребдите за македонскиот јазик, уставните измени, неприфаќањето на македонското малцинство.
Според политичкиот аналитичар Јове Кекеновски, иако било ветувано дека државава ќе добие со тој договор, сепак добивме сосем спротивно.
-Билатералниот спор со Бугарија е внесен во европскиот пристапен процес, наместо Македонија да напредува согласно копенхагешките критериуми, нашиот напредок кон евроатлатскиот процес, стана на некој зависен од исполнување на обврски поврзани со договорот за доброседство, кој што го потпишаа нели претходната власт, изјави Кекеновски за Алфа.
Кекеновски вели дека на Бугарија на овој начин сме и дале оружје трајно да не блокира на европскиот пат.
-И да го исполниме барањето за внесувањето на Бугарите во Уставот, не сме сигурни дека нема да има нови барања. Трето, уставните измени се поставени како услов пред вистинско отворање на преговарачките кластери, што исто така не дава гаранција. Четврто не постојат цврсти гаранции дека со пристапување кон уставни измени, ќе се завршат тие бугарски барања, изјави Кекеновски.
Францускиот предлог на улица извади и илјадници граѓани, кои две недели секојдневно излегуваа да изразат својот револт. Сепак, тоа не беше доволно за тогашната власт во Собранието да си го протуркаа својот план на штета на државата.
Матеја Петровски