Министерката за енергетика, рударство и минерални суровини Сања Божиновска се сретна со претставници на германската развојна банка КФВ, на која беа разгледани тековните активности и можностите за понатамошно продлабочување на соработката во областа на енергетската ефикасност.
Во фокусот на разговорите беа тековните активности што КФВ ги поддржува за енергетска обнова на студентските домови, како и следните чекори за проширување на инвестициите во обнова на јавни и комерцијални објекти, со цел намалување на потрошувачката на енергија, подобрување на условите за користење и долгорочни финансиски заштеди, соопшти Министерство за енергетика, рударство и минерални суровини.
„Енергетската ефикасност е еден од најисплатливите начини да создадеме поквалитетни јавни услуги, пониски трошоци и поодржлив енергетски систем. Нашата цел е да го прошириме опфатот на ваквите проекти и да создадеме систем што ќе носи мерливи резултати и за институциите и за граѓаните“, истакна министерката Божиновска.
На состанокот беше направен осврт и на успешните практики што се спроведуваат во земјите од регионот, при што беа разгледани можностите за размена на искуства и примена на докажани модели во Македонија, со цел побрза реализација на идните инвестиции во енергетската ефикасност.
Посебен акцент беше ставен и на воспоставувањето и ставањето во функција на EPC-системот, кој претставува клучна алатка за мониторинг, верификација и управување со сертификатите за енергетска ефикасност. Неговото целосно оперативно функционирање ќе овозможи поголема транспарентност, подобро следење на резултатите од спроведените мерки и поквалитетно планирање на идните инвестиции, посочуваат од Министерството и наведуваат дека продолжуваат да ги зајакнуваат партнерствата со меѓународните финансиски институции, со јасна цел – повеќе инвестиции во енергетската ефикасност, помодерна јавна инфраструктура и одржлив енергетски развој во интерес на граѓаните и економијата.
