Кога правдата ќе стане прескапа, бесплатната правна помош е единствениот пат до суд за најранливите граѓани. Таа не смее да зависи од економската или социјалната положба на граѓаните, ниту пак од тоа колку пари има некој, нагласува академик Владо Камбовски.
„Значи, издвојувањето на такви средства на државно рамниште е исклучително скромно. Тоа треба да се зголеми, треба и вкупната организација на бесплатната правна помош да се зајакне со помошта што треба да доаѓа од други институции, не само од адвокатите, туку и од граѓанскиот сектор, граѓанските организации. Тука се особено важни и правните клиники кои треба да се развијат на правните факултети“, вели академик Владо Камбовски.
Голем дел од граѓаните кои имаат право на бесплатна правна помош сè уште не се доволно информирани дека можат да ја користат. Според досегашната практика, најголем број барања се поднесуваат за имотно-правни спорови, семејни и бракоразводни постапки, мерки за заштита од семејно насилство, како и за наследни постапки.
„Во минатата, 2025 година, ние обезбедивме бесплатна примарна правна помош за над 5.000 граѓани кои го остварија тоа право и обезбедивме право на секундарна правна помош за стотици граѓани. Тоа значи бесплатно застапување пред судовите, право кое им е обезбедено на секој што финансиски не може да си обезбеди пристап до правдата“, вели Ален Деребан, заменик-министер за правда.
Бесплатната правна помош е наменета за лицата со ниски приходи, жртвите на семејно насилство, лицата со попреченост и другите ранливи категории. Во следните три години, во рамки на регионалниот проект што го реализира Министерството за правда, ќе бидат обучени 150 професионалци, кои ќе обезбедуваат бесплатна правна помош за околу 1.500 корисници.
