Во рамки на караванот „Каде што срцето е дома“, министерот за локална самоуправа Златко Перински денеска оствари работна посета на Општина Кисела Вода, каде што се сретна со градоначалничката Бети Стаменкоска-Трајкоска, членовите на Советот и претставници на општинската администрација.
Како што соопшти Општина Кисела Вода, на средбата се разговараше за тековните активности и развојните приоритети на општината, реализацијата на капиталните инвестиции, како и за можностите што ги нуди Ресурсниот центар за поддршка на општините, преку кој Министерството за локална самоуправа обезбедува стручна, техничка и советодавна поддршка.
-Посебен акцент беше ставен на трите столба на кои Министерството ја темели поддршката на локалната самоуправа: обезбедување финансиски средства за реализација на општинските проекти, зголемување на финансиската независност на општините и споделување знаење и експертиза. Во таа насока беше истакнато дека Скопје и скопските општини се меѓу првите вклучени во процесот на унапредување на финансиската самостојност на локалната самоуправа, при што е формирана работна група која ќе работи на прашања поврзани со локалните даноци и комуналните такси – се посочува во соопштението.
Се разговарало и за потребата од подобрување на административните капацитети на општините, како и за воспоставување на подобра софтверска поврзаност меѓу општините. Преку Ресурсниот центар, на општините им се достапни експерти од различни области кои обезбедуваат бесплатна стручна поддршка по електронски пат, а беше најавена и работилница за подготовка на развојни планови што ќе се одржи во текот на наредната недела.
На состанокот стана збор и за подготвените измени на Законот за меѓуопштинска соработка, кои во наредниот период ќе бидат доставени до општините на разгледување и давање предлози. Министерот Перински истакна дека директната комуникација со локалната самоуправа е неопходна за навремено препознавање на предизвиците со кои се соочуваат општините и за креирање соодветни решенија.
-Нашата определба е да бидеме постојан партнер на општините и да обезбедиме конкретна поддршка таму каде што е најпотребна. Преку Ресурсниот центар создаваме систем кој, на нивно барање, ќе им помогне на општините полесно да ги надминуваат административните и техничките предизвици и поефикасно да ги реализираат своите развојни цели – изјави министерот Перински.
Во рамки на двата владини јавни повици, за Општина Кисела Вода се одобрени вкупно 24 проекти во вредност од 528.529.882 денари. – Овие средства претставуваат значајна поддршка за реализација на проекти кои директно ќе придонесат за подобрување на условите за живот на граѓаните и за понатамошен развој на општината – нагласи Перински.
Тој посочи дека Владата продолжува со силна поддршка на локалниот развој преку капитални инвестиции во општините.
-Ова е можност за суштински дијалог за предизвиците и стратешките цели пред кои се наоѓа Кисела Вода. Во рамките на денешните состаноци со мене, советниците и раководителите на општинските сектори, разговаравме за конкретни модели за поддршка од страна на Министерството. Од особена важност е што Министерството за локална самоуправа стави на располагање Ресурсен центар за поддршка на развојот на општините. Ова за нас претставува вреден дополнителен инструмент кој нуди стручна помош и дигитални алатки, што ќе ни овозможат уште подинамично и поуспешно да пристапиме кон изработка и реализација на нашите идни проекти – изјави градоначалничката Стаменкоска-Трајкоска.
Работната посета беше дел од активностите за унапредување на соработката меѓу централната и локалната власт и поддршка на развојните процеси во општините.
