Инвазија од бубашваби, лебарки и стаорци во Скопје. Скопјани од различни делови од градот велат дека секојдневно ги гледаат овие штетници речиси на секој чекор, како во нивните домови, влезови, гаражи, па дури и на улиците.
„Стаорци не сум видел бидејќи не одам по подруми, но бубашваби има. Дома имам, колку сакаш ги има. Претежно и по скалите, кај што има излези од канализација, по вертикалите. Има, треба дератизација.“- велат граѓаните.
Од Град Скопје велат дека веќе е извршена дезинфекција и дератизација. Официјално до нив досега немало поплаки, но не го исклучуваат проблемот. Апелираат доколку има потреба и општините да превземат дополнителни мерки.
„Општините веќе спроведоа дезинфекција и дератизација, тоа е нивна обврска. Што се однесува до појава на змии, јас искрено освен една слика што била превземена од претходните години, да бидам искрен до сега немам видено.“– вели градоначалникот на Град Скопје Орце Ѓорѓиевски.
Надлежните велат дека интензивно работат на подобрување на комуналната хигиена и уредувањето на јавните површини низ градот. Според нив, тревниците редовно се косат, парковите и кејот се уредени, а екипите на комуналните претпријатија секојдневно се на терен и ги перат улиците.
