На подрачјето на Општина Берово денеска започна општата дератизација на канализациониот систем, како дел од редовните превентивни мерки за заштита на населението од заразни болести и обезбедување здрава животна средина.
Активностите се реализираат согласно Законот за заштита на населението од заразни болести и Програмата за спроведување на општите мерки за заштита на населението од заразни болести за 2026 година на Општина Берово.
Од локалната самоуправа информираат дека дератизацијата ја спроведуваат стручни екипи на Центарот за јавно здравје – Куманово, врз основа на склучен договор за реализација на мерките за заштита на населението од заразни болести на територијата на општината.
-Со акцијата ќе бидат опфатени градот Берово, како и населените места Русиново, Ратево, Владимирово, Смојмирово, Будинарци и Митрашинци. Покрај тоа, третман ќе биде извршен и на депонијата за комунален отпад, како и во туристичката населба Беровско Езеро, информираа од Општина Берово.
Во рамки на дератизацијата, како што додадоа оттаму ќе бидат третирани околу 300 шахти од канализациониот систем, при што ќе се користат кумарински мамци во различни облици – парафински блокови, пелети и брикети. Надлежните посочуваат дека ваквиот третман претставува ефикасна мерка за контрола на популацијата на глодари и намалување на ризикот од појава и ширење на заразни болести.
Од Општина Берово нагласуваат дека и во наредниот период ќе продолжат со спроведување на превентивни активности насочени кон заштита на здравјето на граѓаните и одржување на безбедна и здрава животна средина, во согласност со законските обврски и годишните програми за јавно здравје.
