Државниот инспекторат за животна средина и Центарот за управување со кризи ќе ја унапредуваат меѓуинституционалната координација во областа на заштитата на животната средина, управувањето со ризици и справувањето со кризни состојби.
Со Меморандум за соработка, потпишан денеска во присуство на министерот за животна средина и просторно планирање Муамет Хоџа, се предвидува редовна размена на информации и податоци, заеднички активности за превенција и рано предупредување, како и соработка во јакнењето на капацитетите на двете институции.
Хоџа порача дека ефикасната заштита на животната средина бара силна координација и навремена комуникација меѓу надлежните институции.
– Нашата цел е јасна – институциите да не работат изолирано, туку како еден систем. Систем што навреме препознава ризици, реагира побрзо и спречува поголеми последици по животната средина и здравјето на граѓаните – рече Хоџа.
Меморандумот опфаќа и соработка во подготовка и реализација на заеднички проекти, организирање обуки и размена на стручни искуства, како и активности насочени кон унапредување на техничките и институционалните капацитети на двете институции.
Министерството за животна средина и просторно планирање соопшти дека останува посветено на поддршка на иницијативи кои водат кон повисоко ниво на заштита на животната средина.
